Dili pa lang dugay niluwat og pamahayag ang tagdumala sa Cebu City Jail (CCJ) nga way nakigkunsabo nga jail officer sa pagpalusot og kontrabando sa bilanggoan, apan usa ka bag-ong dinakpan nga nakuhaan og shabu nga mobalor og P5.6 milyunes nitug-an nga gisugo lang siya sa pagbaligya sa drugas sa iyang kontak nga naa sa jail.

Kini ang gibutyag ni Henry Pitogo Abregana, alyas Daot, 19, taga Sitio Samayo, Barangay Lorega San Miguel, dakbayan sa Sugbo ngadto sa kapulisan human siya nakuhaan og dul-an sa usa ka kilo nga shabu atol sa buy-bust sud sa Carreta Cemetery sa Brgy. Carreta, dakbayan sa Sugbo, alas 11 sa buntag sa Miyerkules, Marso 29, 2023.

Si Abregana nagkanayon nga naengganyo siya sa pagsulod sa ilegal nga kalihukan bugti sa P10,000 nga suhol kon mahurot og hatod ang drugas.

Samtang, ang nihimo sa malampuson nga operasyon mao ang City Drug Enforcement Unit (CDEU) sa Cebu City Police Office (CCPO) nga gipangulohan ni Lieutenant Colonel Dindo Juanito Alaras.

Matod ni Alaras, ilang gi-monitor og kapin sa duha ka mga semana si Abregana hangtod nga giplano ang operasyon.

Gihulagway niya nga makonsiderar nga regional high individual sa pagpayuhot og drugas ang suspek tungod sa kalapad sa iyang hagbunganan ug gidak-on sa iyang mahalin.

GINGANLAN

Si Colonel Ireneo Dalogdog, hepe sa CCPO, nagkanayon nga nigawas ang ngalan ni Abregana ug gipanid-an human siya gitudlo sa laing drug personality nga nadakpan sa miaging buwan sa Sitio Lahing-lahing, Barangay Mabolo.

Dugang ni Dalogdog, lakip sa gitug-an sa suspek nga nisugo kaniya sa ilegal nga drugas giila nga usa ka Jomari Castro, alyas “Mayi,” piniriso sa CCJ, lakip sa amahan ug inahan, tungod usab sa kaso sa drugas.

Bisan naa sa sulod sa bilanggoan, dason ni Dalogdog, nagpadayon ang kontak niini sa gawas pinaagi sa cellular phone nga maoy mopahibawo kaniya labot sa supply sa ilegal nga drugas.

“Ang iyang source sa illegal drugs gikan kini kay a certain Jomari Echivarri Castro, aka Mayi. Kini si alyas Mayi na detain ni karon sa Cebu City Jail kay kini si Jomari Castro siya ang nag-alaga aning maong suspect, siya ang naga pakaon,” matod ni Dalogdog.

Niadtong Marso 23, 2023, si Jail Officer 3 Blanche Bation Aliño, tigpamaba sa CCJ, niingon nga wala nay kontrabando sa ilang pasilidad ug matag greyhound operations way nakuha nga cellular phone gikan sa mga person deprived of liberty (PDL).

Matod ni Aliño, kini ang resulta sa imbestigasyon sa Bureau of Jail Management and Penology (BJMP) nga walay nalambigit nga personnel sa bilanggoan subay sa alegasyon sa usa ka PDL nga mahal ang bayad bugti sa pagpalusot og cell phone nga mokantidad og P30,000 ngadto sa P50,000.