SUBAY niadtong nahitabo nga linog adlawng Martes sa hapon, Abril 23, gipahibawo sa Department of Energy (DOE) Visayas nga wala ra’y naapektohan nga planta sa kuryente ug nagpabilin nga stable ang supply sa kuryente sa tibuok Visayas grid.

Matod sa officer-in-charge (OIC) sa DOE Visayas Engr. Jose Rey Maleza nga wala makatay-og ang 6.5 magnitude nga linog sa San Julian, Eastern Samar sa mga planta sa kuryente nga nagsupply sa Kabisay-an.

“All power plants are in normal condition, no damages during earthquake,” si Maleza nagkanayon.

Tuig 2017 dihang nitay-og usab ang 6.5 magnitude nga linog sa Jaro, Leyte diin usa ka Geothermal Power Plant ang naapektohan hinungdan nga aduna’y unscheduled power interruption sa mayoriya sa mga isla sa Visayas.

Matod ni Maleza nga lakip ang transmission lines nga naapektohan niadtong 2017 hinungdan nga lapad ang kadaot niini nga nasinati hilabi na sa supply sa kuryente.

Ang Visayas mayorira niini nag-agad sa Coal Power Plants ug Geothermal Power Plants.

Samtang gipahibawo usab sa DOE Visayas nga nakatala na sila og labing taas nga demand sa kuryente sa Visayas grid niadtong Abril 12, diin niabot kini sa 2,095 megawatts.

Itandi sa labing taas nga demand sa 2018 nga 2,052MW niadtong Mayo 24, 2018.

“We experienced the highest recorded to-date demand of 2095MW last April 12, surpassing last year’s highest demand of 2052MW,” dugang pasabot ni Maleza.

Samtang, gipahibawo usab sa GMR Megawide - Cebu Airport Corporation, ang nagdumala sa Mactan Cebu International Airport (MCIAA), nga wala maapektohi ang maong tugpahanan sa linog niadtong Martes, Abril 23, ug padayon ang normal nga operasyon niini sa pagkakaron.