SA DILI madugay, mabalik na unya sa iyang orihinal nga porma ang Unit-3 sa Carbon Market sa Barangay Ermita, dakbayan sa Sugbo.

Kini human adunay gitagana nga P10 milyones nga pundo si Mayor Edgardo Labella para maoy igasto sa mga guba mga parte sa merkado.

Si City Administrator Floro Casas Jr. nagkanayon nga nahuman na ang program of works and estimates (Powe) nga giandam sa Department of Engineering and Public Works (DEPW) para sa ipahigayon nga repair.

Ang City Administrator nitug-an nga prayoridad sa renovation mao ang pag-ilis sa atop sa Unit -3 diin nahimutang ang mga baligyang prutas nga nasunog niadtong Disyembre tuig 2018.

Gawas sa atop, ayuhon usab ang electrical wiring sa maong merkado labi na ang second floor nga maoy apektado sa nahitabong sunog ug ubang parte sa edepisyo nga ayuhonon.

Si Casas nagkanayon nga gimanduan sila ni Labella nga ipahigayon sa labing dali nga panahon ang public bidding. Iyang gibutyag nga ilakip niya kini sa ilang priority kansang bidding posible nga ipahigayon sunod buwan.

Dugang ni Casas nga posibleng dunay interruption nga sa pagpaninda sa mga stall holder sa Unit-3 sa higayon magsugod na ang renovation.

Ang mga vendors nakigtagbo kang Labella kagahapon nga giubanan ni Market Administrator Jonil Matuguina.

Si Erwin Gok-ong Sr., chairman sa Cebu Market Vendors Development Cooperative (Cemvedco), nihangop sa maayong balita ug nagpasalamat ni Labella.

“Dakong kalipay namo nga ma-repair na gyud ang Unit-III kay grabeng antos namo ana og pangayo sa niaging administrasyon nga matrabaho unya wa gyud niya mapaayo, salamat ni mayor nga siya ra gyud ang makapaayo,” matod ni Gok-ong.

Ang Carbon Market Unit-3 adunay 200 ka stall owners nga nag-antos human kini masunog. (PAC)