SI MAYOR Edgardo Labella magpatabang sa Association of Barangay Council (ABC) paghakot sa mga basura labi na sa suok nga bahin sa 80 ka barangay sa dakbayan sa Sugbo.

Si Labella nagpada og suwat ngadto kang Konsehal Franklyn Ong, presidente sa ABC, sa pagpahibalo nga usa sa prayoridad sa iyang pagdumala mao ang maayong pagkolekta sa mga basura sa dakbayan.

“In this regard, I am humbly asking the barangays through the ABC to assist the Department of Public Services in collecting the garbage in the interior portions of the 80 barangays, “ tipik sa suwat ni Labella.

Gipadayag sa mayor nga magpadayon og kolekta ang mga garbage truck sa Department of Public Services (DPS) sa mga basura sa mga national highway nga sakop sa Cebu City.

Matod sa mayor nga isip alagad sa katawhan sa dakbayan ug pagsunod sa Republic 9003 kun Ecological Solid Waste Management Act of 2000, ilang katungdanan ngadto sa mga lumolupyo ang pagtunol sa batakang serbisyo sama sa hapsay nga siyudad ug luwas gikan sa nagtipun-og nga basura.

Si Ong dihang nakadawat sa letter gikan ni Labella, dali kining nitubag ug nipadangat dayon og memorandum ngadto sa 80 ka barangay kapitan.

“We really hope for your extensive cooperation with this pressing issue the City is facing today,” tipik usab sa suwat ni Ong uban sa paghingusog sa nahiuna niyang order niadtong Septiyembre 14, 2018 may labot gihapon sa maayong paghipos sa mga basura sa dakbayan. (PAC)