Ang Cebu City nakatala og labing daghan nga bag-ong aktibong mga kaso sa coronavirus disease (Covid-19) gikan sa kapin 1,600 ka mga indibiduwal nga gipaubos sa swab test niadtong Enero 19, 2022.

Base sa talaan sa Department of Health (DOH-7), ang Dakbayan adunay 732 ka bag-ong mga kaso, pito ang gika-report nga nakabsan sa kinabuhi samtang 49 ang nangaayo sa ilang sakit.

Mao kini ang labing taas nga natala sukad sa pag-igo sa pandemic niadtong 2020.

Ang Cebu City aduna nay 4,385 ka aktibong mga kaso sa nakalabay lang nga 10 ka adlaw.

Atol sa pagsuwat niining balita, ang tally ug pag-harmonize sa mga kaso sa Covid-19 sa Emergency Operations Center (EOC) nga gipangulohan ni City Councilor Joel Garganera wala pa nahuman.

Apan, matod sa deputy chief implementer sa EOC, adunay posibilidad nga moabot ngadto sa 800 ka active cases ang malista sa dakbayan.