SUBAY sa gihimong paglusad sa Public Utility Vehicle (PUV) Modernization Program sa Land Transportation Franchising and Regulatory Board (LTFRB), gibutyag sa regional director sa LTFRB Central Visayas nga aduna’y laing bidding ang himuon karong buwan sa Agusto alang sa magdagan na unya sa modern jeepneys sa dan Colon.

Matud ni LTFRB Central Visayas Regional Director Colonel Eduardo Montealto Jr. nga mahinungdanon kini hilabi na nga ang dan Colon mao ang labing daan nga dan sa nasod.

Si Montealto nipasabot nga sila lang ang mangulo sa bidding apan ang operators o kooperatiba nga modaog sa bidding mao ang mopalit sa mga modernize nga jeepneys.

Dugang niini nga ang operator pud o ang kooperatiba ang mamili kon e-jeepneys nga susama sa Dakbayan sa Lapu-Lapu nga solar-powered o kadtong Euro4 nga jeep ang kuhaon niini.

Hinuon dili daghan ang units nga idugang sa Colon ug i-modernized lang ning kasamtangan nga nanagan karon.

Dili usab makabutyag si Montealto kon pila ang kantidad sa matag unit sa modern jeepney apan ang operator o ang kooperatiba mao ang mopalit niini.

Sa kasamtangan, ang Dakbayan sa Lapu-Lapu mao ang aduna’y nagdagan nga e-jeepney sa Sugbo.

Aduna kini’y upat ka rota diin sa kasamtangan, 25 pa ka mga e-jeep ang nanagan.

Nasayran nga tag-25 ka mga e-jeep ang gitagana matag rota sa Lapu-Lapu diin kinahanglan nga makompleto ang operator sa pagpadagan niini sulod sa siyam ka buwan human kini mipadagan sa ilang units. (Superbalita Cebu)