Panag-ilog sa duha ka mga lalake sa usa ka babaye nisangko kamatayon sa usa sa alas 7 sa Huwebes sa gabii, Septiyembre 16, 2021sa bukirang lugar sa Sitio Butong, Brgy. Ginatilan, lungsod sa Balamban.

Si Inosentes Bugtai, hingkod, mag-uuma, dunay kapuyo, namatay sa samad pinusilan gikan sa airgun sa iyang silingan nga giila nga si Alejandro Petigo, 54, mag-uuma.

Si Police Executive Master Sgt. Benedicto Bobilles, imbestigador sa Balamban Police Station nga nahinabi sa Superbalita Cebu, nagkanayon nga si Bugtai hubog atol sa kremin.

Si Bobilles niingon nga ang kapuyo nga si Jocelyn Fuentegra, 40, ug mga anak maoy nakasaksi sa kremin.

Si Jocelyn niingon nga siya nibiya uban sa iyang mga gagmay nga bata kang Bugtai human sa ilang lima ka tuig nga panagtipon.

Matod niya nga si Bugtai kanunay nga mahubog ug magmaoy, siya ang hasion.

Tuod man, gihasi nasab siya pagka-Huwebes sa gabii sa ilang balay.

Nipasangil si Jocelyn nga siya gitigbas ni Bugtai, apan wala makaigo kay natumba gumikan sa kahubog.

Nailog ni Jocelyn ang sundang, pero nanghasi gihapon si Bugtai, nidemanda kang Jocelyn nga ibalik ang sundang kay kon dili mas dunay pa unyay mahitabo kaniya.

Si Jocelyn nihatag sa sundang kang Bugtai, kinsa nagsige sa pagyawyaw.

Si Bugtai nilakip sa iyang yawyaw sa ngalan ni Petigo nga iyang karibal.

Mideretso si Bugtai sa pag-adto sa balay ni Petigo, nanghasi ug nanghagad og patay.

Nagkatensyon ang maong dapit kay ang mga anak ni Petigo nga tulo ka mga menor.

Si Jocelyn niapas sab kang Bugtai aron papaulion.

“Paglingi ni Jocelyn, maoy iyang nakita naka posisyonn na ang suspek sa purtahan, nagtion sa de bomba, buto. Dayon mihapa siya (Jocelyn) naigo sa dughan ang biktima,” dugang ni Bobilles.

Nakadagan pa padulong sa payag ni Jocelyn si Bugtai, apan igo lang nakaabot sa tugkaran nahagba.

Sumala ni Bobillesnga love triangle ang motibo sa kremin kay si Petigo kapuyo kaniadto ni Jocelyn.

Si Bugtai maoy hinungdan nga nagbuwag sila.

Si Bugtai gikatahong magselos sab kang Jocelyn kay moadto gihapon sa balay ni Petigo kay moduaw sa ilang mga anak.

Nibutyag si Jocelyn nga wala na sila magtipon og puyo ni Bugtai niadtong Enero ning tuiga.

Nagpayag siyag lahi mga 20 metros ang gilay-on sa balay ni Bugtai.