USA ka lalake nga patay na ang napalgan nga naglutawlutaw sa kadagatan sa wharf sa Barangay San Sebastian. lungsod sa Samboan, pasado alas 7:00 sa buntag niatong Miyerkules, Enero 22.

Si PCmsgt. Bethoven Rocamora sa Samboan Police Station miila sa biktama nga si Christopher Sabello, 45, ug molupyo sa Barangay Santa Cruz Nuevo, Tanjay City sa Negros Oriental.

Matud ni Rocamora nga nasubay nila ang pangalan ug pagkatao sa biktima human sa pag pangutana sa mga kasikbit nga barangay sa lungsod sa Samboan apan nianang unang pag suway sa pagkuha sa mga detalye sa biktima walay nakaila kang Sabello.

Ang imbestigador sa maong lungsod misuway sa pagtawag sa stasyon sa kapulisan sa silingang lungsod atbang nga probinsiya sa Negros Oriental ug Tanjay.

Wala magdugay usa ka Rogelio Sabello ang nakaestorya ni Rocamora ug nahibaloan nga amahan sa biktima kinsa mao usab ang milla sa iyang anak nga si Christopher, Subay sa gihulagway nga mga sapot sa napalgang patay nga mitakdo usab.

Si Rogelio, sa iyang bahin, nga ang iyang anak nabantayan niini nga niadtong petsa 5 hangtud na sa petsa 12 ning buwana, ang iyang anak wala nay kaonkaon ug sige lang og inom ug ilimnong makahubog kinsa gitoohang dunay personal nga problema nga gihambin nga wala mosulti kanila.

Katapusan nga nakit-an si Christopher niadtong Dominggo, Enero 19.

Ug kagahapon, Miyerkules, Enero 22, napalgan kini nga naglutaw sa dagat.

Dugang usab ni Rocamora nga dunay samad sa walang bahin sa liog ang biktima nga posibleng nasamad sa hait nga butang nga gituohang nasangit ang biktima samtang nag lutawlutaw kini sa dagat.

Si Rogelio nibalibad na nga dili nalang ipailawom ug autopsy ang iyang anak nga mao unta ang gisugyot sa pulis sa Samboan. (BBT)