Kapulisan sa Dakbayan sa Toledo giabagan sa lesbian, gay, bisexual, transgender and queer (LGBTQ) community sa siyudad sa pagpatunhay sa kahapasay ug kalinaw.

Si Police Lt. Col. Junnel Caadlawon, hepe sa Toledo Police Station nga nahinabi sa Superbalita Cebu, nagkanayon nga kapin sa 100 ka mga miyembro sa LGBTQ community maoy gamintinar sa kalimpyo ug kahapsay sa kampo sa kapulisan sa Toledo City.

Gawas niini, ang mga sakop sa LGBTQ community daghan pang natampo sa pagpakigbatok sa krimen.

Sumala ni Caadlawon nga ang mga sakop sa komunidad nga naglangkob sa 20 ka buok mo-duty sa police station matag Sabado ug Dominggo.

Ang ilang trabaho mao ang pagpanglimpyo samtang ang uban magsilbing kaabag nila sa ubang programa. Kining maong mga volunteer giabagan sab sa lokal nga kagamhanan ni Mayor Joy Perales.

“Amo ni silang gitawag nga Super Mahuyang, Super Kaabag sa Kapulisan, Super Kaabag sa Katawhan kay dako ilang na-contribute dinhi sa among dakbayan,” dugang ni Caadlawon.

Giklaro ni Caadlawon, nga gawas sa kakugihan, daghan mga miyembro niini ang dunay mga talento nga dakong natabang sab sa kapulisan, labina sa ubang anti-criminality campaign.

Sumala pa niya nga sa kadaghan sa mga sakop sa grupo, ilang kabisado ang mga hilit nga barangay. Dugang ni Caadlawon nga gawas sa LGBTQ, hugot sab silang nakig-alayon sa ubang sektor alang sa kahapasay ug kalinaw sa dakbayan. (GPL)