Moabaga ang Cebu City Government sa medical bills alang sa mga indibiduwal nga di makabayad sa pagpa-check-up sa pasyente sa dengue karon nga ang kaso sa naasoy nga sakit sa dakbayan niabot na og kapin sa 1,000 ang gidahanon.

Si Atty. Gerardo Carillo, chairperson sa Cebu City Disaster Risk Reduction and Management Council (CCDRRMC), nibutyag sa SunStar Cebu kagahapon, Hunyo 12, 2022, nga ang dakbayan maghimo og hotline number nga matawagan sa mga tawo alang sa dinaliang pag-atiman sa kaso sa dengue.

“Kon dunay mga mahilantan unya magduda sila nga dengue, they can call us and we will facilitate the admission to the nearest hospital for check-up,” matod ni Carillo.

Base sa data nga giluwatan sa Cebu City Health Department (CCHD), gikan sa Enero ngadto sa Hunyo 10, ang dakbayan dunay natala nga 1,033 ka mga kaso sa dengue.

Samtang, 17 ka indibduwal namatay tungod sa mosquito-borne disease.

Si Carillo nagkanayon nga nakigtigom na siya sa mga representante gikan sa nagkalainlaing barangay aron pagtultol og ospital nga moatiman sa kaso sa dengue.

Sumala ni Carillo, usa ka fast lane ang giablihan na sa Cebu City Medical Center (CCMC).

Si Carillo nibutyag nga higpit nga gibantayan ang mga kaso sa dengue ug naghimo og lakang sa pagkontrolar nga dili mahitabo ang outbreak.

Sumala sa CCHD, posible nga simtomas sa dengue mao ang hilanat, kakapoy sa lawas, abdominal pain, pasuka ug pagdugo nga grabe na.

Sa miaging pakighinabi kang CCHD head Dr. Jeffrey Ibones, siya nagkanayon nga nisaka ang mga kaso sa dengue sa dakbayan tungod sa kanunay nga pag-uwan.

Ang CCHD niila sa 11 ka mga barangay nga ‘high risk’ sa dengue infection tungod sa daghang mga kaso nga mao ang Barangay Guadalupe, Lahug, Poblacion Pardo, Inayawan, Mambaling, Kamputhaw, Punta Princesa, Talamban, Quiot-Pardo, Capitol Site, ug Tisa.

Si Carillo niawhag sa mga opisyal sa barangay sa pagpadayon sa search and destroy sa itloganan sa lamok nga nagdala og dengue virus.