USA ka 73-anyos nga lolo gideklarar nga dead-on-arrival (DOA) sa tambalanan sa dakbayan sa Bogo human mabanggai og motorsiklo.

Si Patrolman Jhonald Lou Estay sa Santa Fe Police Station nga nahinabi sa Superbalita, niila sa namatay nga si Pelagio Baril, 73, ug molupyo sa Barangay Pooc sa Santa Fe.

Matod ni Estay nga ang aksidente nahitabo niadtong Biyernes sa hapon, Nobiyembre 22, sa provincial road sa Pooc.

Ang drayber sa motorsiklo nga nakabangga ug nakaligis sa biktima mao si John Alvin Elbuena, 38, staff sa kasamtangang bise mayor sa lungsod sa Santa Fe.

Matod sa pulis nga sakaon ang dalan sa dapit nahitaboan nga wala mabantayi ang pagtabok sa lolo samtang ang suspek gikan sa merkado publiko sa Santa Fe paingon sa lungsod sa Bantayan.

Human sa aksidente, gidala sa Bantayan District Hospital si Baril apan giabisohan ang nagdala nga ambulansiya nga adto dalhon sa dakbayan sa Sugbo.

Katapusang biyahe sa barge sa Bantayan gisakay ang biktima aron mahatagan og pagtagad sa dakbayan, apan matod ni Estay, sa pagdunggo sa rampa sa Jagnaya sa lungsod sa Medellin, gisusi sa mikuyog nga nurse ang ilang pasyente ug nasuta nga wala nay pitik ang pulso.

Inay sa dakbayan sa Sugbo dad-on, gidala kini sa dakbayan sa Bogo apan gideklara nga DOA.

Samtang ang suspek nga si Elbuena gidakop human sa insidente ug mag-atubang sa kaso nga reckless imprudence resulting to homicide sa korte. / BBT