ADLAW’NG Dominggo, Enero 20, gipanglantawan na nga mamahimong bagyo ang low pressure area (LPA) nga nakasulod na sa Philippine Area of Responsibility (PAR) Sabado, Enero 19.

Tungod niini, gipahibawo sa Philippine Atmospheric, Geophysical and Astronomical Services Administration (Pagasa) Visayas nga uwanon ang tibuok adlaw sa kasaulogan sa Sinulog.

Matod sa officer-in-charge (OIC) sa Pagasa Visayas Engr. Al Quiblat nga sayo sa buntag masinati na usab ang uwan.

Alas 11 sa buntag Sabado dihang namat-an nga anaa sa 260 kilometros sa sidlakan sa Hinatuan, Surigao del Sur ang maong LPA.

Dugang ni Quiblat nga kon mohimo gyud ni og bagyo ang LPA tawagon kini nga Bagyong Amang nga maoy labing una ng bagyo sa nasod karong tuiga.

Ang maong bagyo anaa kini sa tropical depression nga kategorya diin dili mosaka sa 60 kilometros matag takna ang hangin nga dala niini.

Madag-umon nga aduna'y sagol nga uwan ang masinati karong Dominggo ug nitambag si Quiblat sa mga motan-aw sa grand parade nga magdala kini og kapote aron dili mabasa.

Kon mamahimo, kining bagyo posible nga mo-landfall sa Dinagat Islands o sa Surigao del Norte ug didto masuta kon magpabilin kini nga bagyo tungod kay posible nga mobalik kini pagka-LPA ug mohinay.

Nitambag usab si Quiblat sa mga disaster managers nga alerto niining bati nga panahon tungod kay dili lang uwan ang dala niini apan lakip na usab ang posibilidad sa baha.

Sa labing una nga weather bulletin sa Pagasa alas 10 sa buntag Sabado, lakip ang Central Visayas nga makasinati sa kasarangan ngadto sa kusog nga uwan.