GRABE ang epekto sa coronavirus disease (Covid-19) kay bisan ang tradisyon ug kultura naapektuhan.

Naandan unta nga hayaon ang usa ka patay ug bilaran o kaha, dunay ipahigayon nga relihiyusong kalihukan.

Apan kay panahon man sa Covid-19, ang tanang namatay sa sakit nga kadudahan ang hinungdan, ipalubong gilayon. Ang nakapait kay gamay ra ang makahatod.

Mas grabe ang kasinatian sa kabanay sa 65-anyos nga lalake, kinsa namatay sa pneumonia tungod sa Covid-19.

Namatay si Sebio (di tinuod nga ngan), sa Dominggo sa udto, Mayo 31,sulod sa usa ka pribadong tambalanan sa Dakbayan sa Sugbo.

Kay gikinahanglang ilubong gilayon, wa na paugmai sa igsuong lalake ang lawas agig pagtuman sa health protocol.

Mga pasado alas 8 sa gabii, gidala ang haya ni Sebio sa iyang igsuon ug sa punerarya ngadto sa Cebu City Veteran’s Memorial Park sa Barangay Labangon, Dakbayan sa Sugbo.

Apan wa gilayon makasulod ang porlon kay gibabagan sa mga lumolupyo sa dapit.

Nagduda ang mga lumolupyo sa lubong kay labing unang higayon nga gihimo kini sa gabii. Wa usab kini pagtugot sa Barangay Labangon nga wa usab mapahibawo.

Aron dunay makapatunga, gitawgan sa barangay offiicials sa Labangon si Cebu City Councilor Dave Tumulak.

Mga 15 minutos ang nakalabay, si Tumulak niabot ug maoy nipakalma sa mga tawo.

Sila gipasabot ni Tumulak nga ilubong si Sebio segun sa protocol sa Inter-Agency Task Force for the Management of Infectious Diseases.

“Kinahanglan ang mga indibidwal nga namatay nga dunay kadudahan sa Covid malubong gyud siya kay 12 oras ra ang gihatag nga oras sa IATF nga malubong gyud siya nianang oras,” sulti ni Tumulak sa Superbalita Cebu.

Sa death certificate, kompirmadong Covid-19 ang namatyan sa 65 anyos.

Samtang gipasabot usab ni Tumulak ang mga nanimuyo sa palibot ug ang mga representante sa barangay kalabot sa patay nga di angay kabalak-an nga makatakod pa.

Ang igsuon ni Sebio nga di usab gustong nganlan, nibutyag nga gimandoan sila sa Department of Health nga ipalubong gilayon ang lawas. Wa gisunog o gi-cremate ang lawas kay nahasupak sa ilang tinuohan.