PATAY dihadiha ang usa ka dancer sa usa ka gay bar sa dan ML Quezon, Barangay Pajo, dakbayan sa Lapu-Lapu human pusila sa wala pa mailhing mamumuno, alas 10:00 sa gabii sa Miyerkules, Abril 11.

Ang biktima nailhang si Angelo Lamboloto Llano, 29, lumad nga taga Taguig City sa kaulohan apan temporaryong nagpuyo haduol sa barangay hall sa Pajo.

Matod ni Police Master Sergeant Joefrey Managase, desk officer sa Police Station 3 sa Lapu-Lapu City Police Office (LLCPO), nga Si Llano giingong maoy pag-abot sa club nga iyang gitrabahoan aron mo-punch in dihang gipusil.

Human og punch-in, giingong migawas kini sa club aron adunay kuhaon sa iyang sakyanan nga nag-park sa parking lot sa club.

Kalit dunay niabot nga usa ka itom nga Nissan Navara pick-up diin ang usa sa mga sakay niini daling minaog ug dayong pusil ni Llano sa walay igong rason.

Samad pinusilan sa nagkadaiyang bahin sa lawas ang naangkon ni Llano nga hinungdan sa iyang hinanaling kamatayon samtang ang gunman daling nisibat luwan sa van.

Gitan-aw karon sa kapulisan ang posibilidad kun wala bay nakaaway si Llano gumikan sa iyang pagka dancer.

Wala kini record sa Police Station 3 sa LLPO.

Moabot sa tulo ka mga basiyo sa kalibre .45 nga armas de fuego ang nakuha sa Scene of the Crime Operatives (Soco) gikan sa crime scene.

“Nagkuan pa gyud ta sa mga CCTV sa area atong gi double check aron makuha para atong ma-identified ang suspek. Basig makakuha ta og CCTV diri sa may bridge (first bridge), basin makaabot ang CCTV diha sa atong crossing bitaw kay duolduol ra (sa crime scene). Ang suspect basin padung ni sa bridge pagsibat kay di man siya ka kuan (agi) sa pikas lane,” matod ni Managase. (GCM)