MATAG-OB, Leyte -- Patay ang usa ka maestro human gipusil sa wa mailhing responsable sa Barangay Mansalip, Matag-ob, Leyte, pasado alas 6 sa gabii, Biyernes, Nobyembre 1, 2019.

Ang kapulisan miila sa biktima nga si Michael Vincent Olorvida, 32, minyo, usa ka public school teacher.

Base sa imbestigasyon, sakay sa iyang Nissan Navarra pickup ang biktima uban sa iyang asawa nga si Emma ug duha ka anak nga si Vince, 10, ug Shantille, 2.

Sa dihang padung na mo-maneuver sa iyang sakyanan gikan sa parking area, kalit niabot ang gunman sa kilid sa driver seat ug gipusil ang biktima sa ulo.

Patay diha-diha ang biktima ug dali nga midagan ang gunman padung sa bukirang bahin sa Sitio Ligpong, Barangay Mansalip.

Narekober sa kapulisan gikan sa crime scene ang usa ka magazine sa kalibre .45 nga dunay 6 ka bala.

Padayon pa nga giimbestigar sa kapulisan ang motibo sa pagpusil patay ug kinsa ang responsable. (JKDP)