““SALAMAT kuya sa imong love ug suporta nako, pero imo man ko gibiyaan,” naghilak nga nisulti ang 12 anyos nga si Adrian Villanueva, manghod ni Alexander. Si Alexander lakip sa siyam nga namatay sa disgrasya sa lungsod sa Boljoon niadtong Biyernes sa buntag, Hulyo 19.

Ang mini dumptruck sa Boljoon maoy gisakyan sa mga biktima nga padung unta sa usa ka district meet sa lungsod.

Sila si Alexander ug Adrian ang duha lang sa mga anak nila ni Allan ug Susan Villanueva, taga barangay San Antonio, bukirang dapit sa lungsod sa Boljoon.

Si Alexander, 20, grade 11 sa Cerdenia Malabuyoc high school, ni-absent sa klase aron unta moabiba sa iyang manghud nga grade 6 pupil sa San Antonio Elementary School, ug representante alang unta sa 100-meter ug 200-meter run.

‘Mo-cheer gyud daw siya nako. Ganahan sad ko naa si kuya,” saysay ni Adrian.

Uban usab sa magsuon ang ilang inahan nga si Susan, samtang ang amahan nanarbaho sa Siyudad sa Sugbo.

Sa panghitabo, saysay ni Susan, nga anaa sa iyang kilid si Adrian samtang sa atubangang dapit si Alexander.Pareho sila nga nagyaka sud sa truck de karga samtang nagbiyahe.

Matod ni Susan, mao nalang iyang nakita ang kamagwangang anak nga napangko sa usa ka parte sa dekarga sa dihang kalit lang nadasmag dayon, nabalintong ang sakyanan.

Unang nalabay si Adrian, kinsa nakaangkon og mga samad sa iyang tuong aping.

Samtang sunod nga nakita sa inahan ang maguwang nga nagkadugo na ang ulo ug anaa na naghigda sa iyang tiyan.

Tilimad-on

“Karon ko nakahinumdom nga sa wala pa mi nibiya sa balay, sige gyud siyag ingon nako nga, ‘Amping, Ma, ha, amping baya gyud.’ Natingala gyud ko niya ato nga magkuyog baya mi,” saysay ni Susan sa Superbalita Cebu.

Si Alexander, uban ang laing walo nga nangamatay sa disgrasya sa Upper Becerril dungan nga ilubong alas 9, Dominggo sa buntag, Hulyo 21.

Si Gobernador Gwendolyn Garcia niduaw sa Boljoon kagahapon kay nakigtagbo sa mga biktima ug kabanay.

Gitug-an ni Boljoon Mayor Merlou Derama nga nasabutan sa mga kabanay sa mga biktima nga ilubong dayon ug idungan na usab kay di sila kaako nga magdugay og tan-aw sa mapait nga gidangatan sa mga biktima.

Himuon ang santos nga misa alas 7:30 sa buntag su’d lang sa Boljoon sports complex and multi-purpose. (FMD)