ANG private landfill sa Barangay Binaliw, Dakbayan sa Sugbo wa na modawat og mga basura gikan sa silingan nga local government unit human sila gihangyo sa Cebu City Government.

Si Mayor Edgardo Labella niingon nga sa iyang nasayran, ang Mandaue City Government ug Lapu-Lapu City Government ninghunong na sa paglabay sa basura sa Barangay Binaliw.

Kini human nagkasabot ang ARN Builders nga maoy nagdumala sa landfill ug ang Cebu City Hall nga kanselahon ang P65 milyones nga kontrata nga gipirmahan sa administrasyon ni kanhi mayor Tomas Osmeña para adto ilabay ang basura sa Dakbayan gikan sa Hulyo hangtod Disyembre niining tuiga.

Sa Cebu City, ang Jomara Konstruckt maoy kasamtangang naghakot sa basura paingon sa landfill nga maoy ilang gikakontrata.

Si Engr. Joel Biton, pangulo sa Department of Public Services (DPS), niingon nga base sa iyang nahibaw-an, ang Jomara didto naglabay sa ilang basura sa landfill sa lungsod sa Aloguinsan.

Waste to Energy

Si Labella nagkanayon nga mobubo og puhonan ang ARN builders sa Barangay Binaliw para pagtukod sa pasilidad aron kini makamugnag kuryente gamit ang basura kun waste to energy.

Ang landfill operation nakadawat og reklamo gikan sa gatusan ka mga pamilya nga nagpuyo sa Binaliw, Pit-os, Bacayan ug Talamban nga maoy mga barangay nga maagian sa mga garbage truck gikan sa Mandaue ug Lapu-Lapu.

“My obligation as mayor is to promote the general welfare. It’s good that they (ARN Builders) are receptive to the idea that they should stop the landfill operation,” padayag ni Labella.

Iyang gipadayag nga dihang gipaila pa ang maong proyekto ngadto sa barangay Binaliw, ilang gipatuo ang mga tawo nga kini material recovery ug waste to energy facility.

Wa magpasud

Giingon nga nagginahi ang tagdumala sa landfill sa Aloguinsan sa pagpasulod sa sakop sa Environmental Management Bureau (EMB) 7 dihang nisusi kini sa pasilidad sa miaging semana.

Gibutyag ni EMB 7 regional director Engr. William Cuñado nga nipadala na siya og team sa maong landfill aron mosusi sa status niini. (PAC, HBL)