Gibuksan na alang sa trapiko ang bahin sa Manipis road sa sityo Langoyon, Brgy. Manipis, Dakbayan sa Talisay sa Miyerkules sa buntag, Abril 13, 2022.

Mao kini ang gipahibawo ni Jonathan Tumulak, pangu sa City of Talisay Traffic Operations and Development Authority (CT-TODA) human niya gibisita ang dapit.

Matod ni Tumulak nga nahawanan na sa mga lapok, bato ug uban pang debris sa Department of Public Works and Highways (DPWH) ang mao nga bahin sa karsada.

Sayo kining gipad-an sa DPWH og heavy equipment alang sa road clearing hinungdan nga sa dayon nang udto, naagian na sa mga sakyanan ang dapit.

Ang sityo Langoyon gipasirhan sa miaging semana sa CT-TODA human mibaha ang lapok sa karsada ug nihumok ang yuta sa ibabaw nga kuyaw sa landslide tungod sa pagsige og uwan dala sa bagyong Agaton.

Kay duna may namugos sa pag-agi, si Tumulak nangayo og abag sa kapulisan pinangulohan ni Police Lt. Colonel Randy Caballes.

Si Caballes nipadala og mga pulis sakay sa usa ka patrol car aron pagbantay sa dapit.

Ang karsada maoy agianan sa mga motorista nga mopaingon sa dakbayan sa Toledo ug ubang mga dapit sa habagatang kasadpan.

Sukad sa Miyerkules sa buntag, niarang-arang na ang kahimtang sa panahon human ang bagyong Agaton nahimo na lang low pressure area (LPA) ug gipaabot nga mopalayo sa nasod human motipon sa bagyong Basyang nga gibana-banang di mo-landfall.

Ang Philippine Atmospheric Geophysical Astronomical Services Administration (Pagasa) nibana-bana nga gikan sa Miyerkules sa hapon, ang kahimtang sa panahon sa Sugbo maayo na.

Apan nipahimangno gihapon sa di pagkompyansa labina sa norte nga mga dapit nga nagrabehan sa grabeng pag-uwan nga nisangko sa mga baha ug pagkaguba sa pipila ka mga karsada.