PATAY ang usa ka 11 ka buwan nga masuso human lumsi sulod sa banyo sa inahan nga gituohan nga nakasinatig post partum depression sud sa usa ka lawak sa dormitory sa P. Gomez st., Brgy. Sto Niño, Siyudad sa Sugbo, alas 6 sa gabii sa Biyernes, Hulyo 26.

Ang inahan nga si Jinky (di tinuod nga ngan), 31, lumad nga taga Tangub City, Misamis Occidental.

Matod ni Police Major Joemar Pomarejos, hepe sa Waterfront Police Station, nga naabot sa siyudad sa Sugbo si Jinky uban sa iyang amahan aron patambalan ang masuso.

Niabang silag lawak sa dormitory, apan ang apohan sa bata nigawas kadali aron mopalit og tubig. Sa iyang pagbalik, natingala na lang siya nga wala na ang bata sa higdaanan.

Gipangutana niya iyang anak kon asa na ang bata, apan gitubag siya nga “naay demonyo diring dapita.” Dinhi na nahadlok ang apohan, iyang gitan-aw sa banyo ug didto iyang nakita ang masuso nga natuwad na sa balde nga puno sa tubig.

Gidali pa nila pagdala sa tambalanan ang bata, apan gideklarar sa mga doktor nga dead on arrival. Sa imbestigasyon sa Waterfront Police Station, nasuta nga si Jinky adunay history nga gi rehab sigun sa pamahayag sa amahan niini.

“Base sa estorya sa iyang father niagi na daw og rehab ang iyang anak sa mental, pero dili ta maka conclude,”matod ni Pomarejos.

Gisuwayan pag imbestigar nila si Jinky, apan di nila masabtan ang gipangsulti niini.

Bisan pa niini, ipasaka sa kapulisan ang kasong parricide sa korte ugmang adlawa, Lunes, Hulyo 29.