NAGPABILING normal ang operasyon sa Mactan-Cebu International Airport (MCIA) taliwala sa haze o gabon sa Metro Cebu, resulta sa forest fire sa Sumatra, Indonesia.

“So far, wa miy na-receive nga complaints from airlines or pilots sa kanang hitaboa (haze),” matod ni Mary Ann Dimabayao, tigpamaba sa MCIA.

Matod sa opisyal nga di kini suliran sa higayon nga adunay susamang phenomenon nga moepekto sa Sugbo kay ang MCIA adunay modernong navigational system nga mogiya sa matag flight sa abyon nga mo-landing o mo-take off sa runway.

Kini gumikan sa kabalaka sa posibleng masinate nga zero visibility.

Apan ang gibantayan sa MCIA ang tapok sa migratory birds ug native nga mga langgam sa runway nga gihulagway nga peligro sa higayon nga adunay bird strike.

Aron nga kini kalikayan, ang tugpahanan adunay gi-umol nga Wildlife Committee nga gitahasan sa pagbantay sa mga pundok sa langgam.

Si Joel Malate, operations department, nipahibawo nga aduna silay gi-andam nga gas cannon o lantaka nga ilang gamiton sa pagbugaw sa mga langgam.

Gikan sa Marso paingon na sa Oktubre, mohugpa ang migratory birds nga giingong gikan pa sa Siberia.

Ang species sa langgam nga moabot sa runway sagad Chinese egrets ug aduna say mga buntog ug maya.

Gisiguro sa operations department nga aron kalikayan ang pagdagsa sa mga langgam, ilang kanunayon ang pagputol sa mga sagbot diha sa hawanan sa runway nga maoy balik-balikan sa maong mga mananap.

“Magbilin ra gyud og one inch nga gitas-on sa sagbot,” dugang pa ni Dimabayao.

Sa higayon nga di pamutlon ang sagbot, modaghan ang mga insekto sama sa grasshopper ug uban pa nga maoy pangan-on sa langgam. (FVQ)