GIDASIG karon ni Cebu City councilor Dave Tumulak ang mga party organizers nga kung adunay himuon nga "concert-party" atol sa mga kalihukan sa Sinulog adto kini ipahigayon sa sulod sa mga mall.

Ang katuyoan niini aron mahatagan og hugot nga seguridad ang mga tawo nga mosaksi ug dili na masobli pa ang mga insidente sa mga nanglabay nga mga street party sama sa kamatayon sa usa ka 19- anyos nga babae human kini giingon na-overdose sa Ecstasy sa dihang nitambong kini og party sa Cebu Business Park niadtong Enero 19 karung tuiga, usa ka adlaw sa wala pa gipahigayon ang Sinulog Grand Parade.

Gawas niini aduna usab mga kalingawan sa mga silingang dakbayan sa Sugbo nga mao ang dakbayan sa Talisay, Mandaue ug Lapu-lapu aron mabahin ang mga tawo.

Hinuon giklaro ni Tumulak nga sa pagkakaron wala pay ordinansa sa pag dili niining mga concert party nga himuon sa open area apan usa ni sa ilang gitinguha nga mapatuman kini sa nagsingabot nga mga kalihukan sa Sinulog sunod tuig.

Daghan ang mahimong epekto niining maong plano matod ni Tumulak tungod kay maka-luag kini sa trapiko sa dakbayan sa Sugbo diin wala lang maka tutok ang tawo sa usa ka lugar nga maoy hinungdan nga mabara ang dagan sa mga sakyanan. (Superbalita Cebu)