PIPILA ka adlaw human nidaog sa eleksiyon, nag-atubang gilayon og reklamo sa buhatan sa Ombudsman Visayas sila si Dumanjug Mayor Guntrano Gungun Gica ug ang iyang igsuon nga si Konsehal Wado Gica.

Si Gungun nasublian sa posisyon pagka-mayor niadtong May 13 elections, samtang si Wado nidaog pagka-bise mayor.

Niadtong Mayo 22, usa ka Hector Quirante, taga Ilaya, Dumanjug, niduso og mga reklamong serious physical injury, illegal detention, grave coercion, planting of evidence ug kalapasan sa election gun ban, batok sa magsuong Gica.

Matod niya, gi-pick-up, gikulata ug giti-unan siya og armas sa magsuong Gica ug ingon man sa gihulagway niyang ilang mga bodyguard nga nagdala og tag-as nga armas.

Giingong nahitabo kini niadtong Mayo 11, duha ka adlaw sa wa pa ang eleksiyon.

Sa iyang reklamo, siya nipasangil nga wa kauyon silang Gica nga nag-apil-apil siya sa pulitika isip driver o staff sa kaatbang ni Gungun sa mayoral race nga si Cesar Baricuatro.

Ang giingong pagpangulata niresulta sa pagkatangtang sa usa sa iyang mga ngipon ug pagka-liki sa laing usa, ingun man sa nasinating bun-og sa iyang lawas.

Apan matod ni Gungun, wa siya makaila sa reklamante.

Nanghinaot siya sa iyang mga kaatbang sa politika nga hunongon na ang pag-gukod kaniya ilabi na kay siya gihapon ang giboto sa katawhan sa ilang lungsod.

“Wala ko kaila gali. Human na man ang election, dili na lang unta himu-himoan ko og mga issue against nako. Mana man ang eleksiyon,” matod ni Gungun.

Gawas sa magsuon, gikiha usab ang mga kuyog sa mga Gica nga silang Raymond Lanojan, Darwin Castro ug Gino Do.