GIPATAWAG ni Lapu-Lapu City Mayor Junard Chan ang tulo ka mga kawani sa Solid Waste Management Team sa kagamhanan kinsa nakuhaan og hulagway sa usa ka concerned citizen nga wala magsul-ob og mask.

Kini aron klarohon ngadto sa tulo nga walay gipili karon ang gipatumang lagda sa dakbayan kalabot sa pagsul-ob og mask bisan empleyado sa kagamhanan.

Ang tulo nailhang sila si Louie Llimit, Fidel Inihao ug Rexor Dulangon.

Sa miaging semana, usa usab ka kawani sa Barangay Mayor’s Office (BMO) nga nailhang si Lucino Solon ang gipatawag sa mayor human nakuhaan usab ug hulagway nga wala mag-face mask.

Wala mobayad sa multa nga P1,000 ang tulo sanglit mas gipili nila nga mopaubos sa community service ubos sa kagamhanan.

Apan gipahimangnoan sila ni Chan nga kun ugaling mausab nga adunay maka-report sa iyang buhatan batok kanila nga wala na usab sila mag mask hayan ipaubos na sila sa suspensyon inay isyuhan og citation ticket.

Ug kun mausab pa gihapon ang salaod sa ikatulong higayon, hayan taktakon sila sa serbisyo.

Ang tulo sa ilang habig midepensa nga gikan sila nga namutol og kahoy alang sa road clearing sa dakbayan ug nalimot ug sul-ob og mask samtang padung nang mopauli luwan sa sakyanan sa kagamhanan.

“Bisan pa og mamutol mo ug kahoy dili na sagabal kun mag face mask unya base diri sa picture nga gipadala wala mo mamutol na ug kahoy nagsakay namo sa sakyanan. Wala mo mailhi pag-una nga taga city hall apan nailhan mo tungod sa inyong sakyanan,” pagpasabot ni Chan ngadyo sa tulo.

Giawhag ang tulo sa pakig coordinate sa ilang mga barangay alang sa schedule sa ilang community service.

Niadtong Marso 6 gipapunit ug basura ang moabot sa 542 ka mga minimum health protocol violators sa dakbayan nga unang naisyuhan ug ticket niadtong Marso 4 ug 5. (GCM)