ANG operator sa private landfill sa Barangay Binaliw, Dakbayan sa Sugbo gihatagan og 100 ka mga adlaw sa pagtiwas sa pagtukod sa ilang material recovery facility sa Environmental Management Bureau (EMB) 7.

Sa technical meeting sa EMB uban sa ARN Central Waste Management Inc. officials ug nalambigit nga mga residente sa Barangay Binaliw nga nangulo sa signature campaign, ilang nakab-ot ang mga solusyon nga pagahimuon, matod ni EMB 7 Director William Cuñado.

Base sa tigom, gawas nga ang ARN gihatagan og 100 ka adlaw sa pagtiwas sa MRF building, kinahanglan usab nga pagamiton ang ilang haulers og compactor trucks aron maayo ang pagkatabon.

Gikinahanglan usab nga way moawas ug way duga gikan sa basura sulod sa 30 ka mga adlaw.

Padusuon usab sila og position paper nganong di sila silutan sa paglapas sa environmental compliance certificate (ECC) condition nos. 5, 17 ug 24 sud sa 30 ka mga adlaw.

Gihagit

Giawhag sa apektadong residente sa barangay Binaliw ang ilang konseho sa paghimo og signature campaign kon wa mangalisbo ang baho ug wa modaghan ang langaw gumikan sa landfill.

Ang pamahayag gibuhian ni retired Col. Jefferson Omandam kinsa naana nagpuyo duol sa lugar ug maoy spokesperson sa Protect Binaliw Movement( PBM) human niingon si barangay Kapitan Viviane Ruste nga way baho, way langaw ang landfill ug way nangasakit. (PAC, JJl)