DILI na unya gikinahanglan nga magbayad ug motuyo pa og internet café aron lang sa pag-research o paghimu sa ilang mga assignment ug project, ang mga tinun-an sa dakbayan sa Talisay.

Kay sa dili pa matapos ning tuiga, tulo ka mga Aksyon Agad Learning Center ang mapahimutang sa lokal nga kagamhanan sa dakbayan.

Mapahimutang na ang container van-type nga library sa tulo ka mga pilot barangays nga mao ang Barangay Lagtang, Tabunok ug Bulacao human nga nakagahin na og lugar ang tulo ka mga barangay alang niini.

Gituyo nga container van nga i-desenyo nalang ang sulod isip library, ug kabutangan og mga computer units, diin libre nga makahimu’g pag-search alang sa ilang mga project ug assignments ang mga tinun-an bisan unsa nga grade level.

Gihimo ang paglusad kaganihang buntag, diin mismo si Mayor Gerald Anthony "Samsam" Gullas ug mga kaubanan niini sa Talisay City Council ang nangulo.

Iyang gipasabot nga imbes nga daku nga City Library ang ilang ipatukod, mas gipili nila nga mga learning center diha sa barangay, aron mas duol ug mas dali sa kabataan ang pagtuyo sa lugar.

Dugang sa mayor nga gawas nga sila sa kagamhanan ang mamalit og mga gikinahanglang libro ug ubang gamit sa learning center, giaghat usab niya ang mga business sector o si bisan kinsa nga mo-donate og mga libro.

Ilabi na sa mga kompanya, diin iyang hangyo, nga ilakip sa ilang corporate social responsibility ang paghatag og mga computer units, ug ubang mga gamit alang sa learning center sa barangay diin nahimutang ang ilang establishment.

Naghinaot ang mayor nga sa sunod tuig, malukop na nila ang 22 ka mga barangay nga tagsa ug aduna nay learning center. (Superbalita Cebu)