GIAWHAG sa Cebu City Council ang Cebu City Transportation Office (CCTO) pagsusi ug pag-evaluate sa pay parking streets gumikan sa awhag ni Presidente Rodrigo Duterte nga hawanan ang mga karsada gikan sa obstruction o babag.

Si Konsehal Phillip Zafra, chairman sa committee on public order and safety sa konseho, nagkanayon nga adunay mga gagmay nga karsada sa dakbayan nga gihimong pay parking zone ug mao na hinuon ang nakamugna og kahuot sa dagan sa mga sakyanan.

“Atong nakita nga adunay mga hagip-ot kaayong dalan gihimo gihapon nga pay parking area. Imbis moluag ang trapiko nisamot na hinuon kahuot,” padayag ni Zafra.

Ang konsehal sa south district nagkanayon nga sulod sa dugay nang panahon, ang mga karsada hilabi na sa downtown area gihimo na kining parking areas ug sa tan-aw ni Zafra dili na kini mohaom sa bag-ong panahon gumikan sa pagdasok na sa mga sakyanan karon.

Ang CCTO pinangulohan ni Executive Director Ricardo Barandog maoy mohimo sa re-assessment ug re-evaluation sa tanang pay parking streets sa siyudad.

Sila sab ang mohimo og recommendation kon unsay angay buhaton sa mga pay parking areas nga nakahatag og kahuot sa dagan sa mga sakyanan hilabi na sa peak hours sa tingklase. (PAC)