NIMANDO ang Cebu City Police Office sa 11 ka police stations nga patrolyahan og apil ang mga sudlonong bahin sa kabarangayan human nasuta nga daghan sa mga residente nga relax na kaayo.

Tungod sa ka relax, wa na motuman sa minimum health standard, sama sa pagsul-ob og mask ug paglikay unta sa tapok.

Matod ni Police Lieutenant Colonel Wilbert Parilla, deputy city director for operation sa CCPO, nga nakadawat sila og report nga ang mga tawo sa mga sudlonong bahin sa barangay wala na mag sul-ob sa mask ug mag-inom na daplin sa karsada.

Tungod niini, ilang ibalik ang pag estrikto sa tanang lagda sa Inter-Agency Task Force (IATF) sanglit gipaubos pa gihapon ang Siyudad sa Sugbo sa modified general community quarantine (MGCQ) ug nagsaka pa usab ang mga kaso sa coronavirus disease 2019 (Covid-19).

“Kani mao na sad ni atong i-concentrate nga ang atoang mga barangay naa na sad tay nadawat nga reports nga didto sa interior portion. Ato na ni i-direct ugma sa buntag. We will have a conference then we will direct our chief of police nga mo-monitor so that atong madungan ang ilang mga area nga daghang violations na sad,” matod ni Parilla.

Daw sa wa nay kahadlok ang mga tawo sa virus sa mga barangay nga maoy usa sa mga hinungdan nga misaka ang kaso sa Covid 19.

Sigun sa Emergency Operations Center nga ang usa sa hinungdan sa pagkatap sa virus tungod sa mga tapok-tapok, sama sa mag- inom diin nagpasahay lang sa usa ka baso kun tagay.

Nabantayan karon sa mga pulis nga mibalik ang mga estambay nga mag-inom daplin sa dalan nga wa magsul-ob sa ilang mask. (AYB)