Temporaryo nga gipasirhan ni Ormoc City Mayor Richard Gomez ang mga tourist destination sa siyudad sugod niadtong Mayo 14 hangtod Mayo 31, 2021.

Kini tungod sa subli nga pagsaka sa mga kaso sa coronavirus disease 2019 (Covid-19) sa siyudad sud lang sa pipila ka adlaw.

Ang temporaryo nga pagsirado gipaagi sa Executive Order 171 nga gipirmahan sa mayor bag-ohay lang.

Lakip sa kamanduan ang estriktong pag monitor sa mga mass gathering tungod kay daghan ang fiesta karong buwana.

Base sa EO 171, temporaryo nga gipasirhan ang mosunod nga tourist destinations: Lake Danao Natural Park, Ormoc Mangrove Ecopark, Kan-idon Cave, Leyte Alto Peak, Lake Janagdan, Tres Aguas, Mag-aso Falls.

Lakip na ang Cabintan Hotspring, Mt. Alingatong, Sulfatara, Lake Kasudsuran, Sayahan Falls, Miranda Falls, Paraiso Falls, Lawis Falls ug Ormoc Museum.

DILI MANGIMBITAR

Hugot usab nga gipaimplementar sa mayor ang pagdili sa pagpundok sa daghang mga tawo hilabi na kay daghang barangay ang magsaulog og fiesta karong buwana.

Base sa kamanduan, kon sulod sa balay maghikay, dapat kadto rang mga namuyo sa maong panimalay ang magselebrar, dili pwede mangimbitar og taga laing lugar bisan pa og igsuon. Apan kon ang panimalay dunay hawanan, dapat 50 porsyento lang sa kapasidad sa hawanan ang pwede gamiton. (JKDP)