GIPASAKAAN nag upat ka mga kasong acts of lasciviousness sa Women and Children Protection Desk sa Pardo police station ang trike driver nga gitudlo sa upat ka mga bata nga nagtungha pa sa elementarya nga maoy nangabuso kanila.

Matod ni Police Major John Kareen Escober, hepe sa Pardo Police Station, nga kasong acts of lasciviousness lang una ang gipasaka nila batok kang Falcundo Tabura ngadto sa Cebu City Prosecutor’s Office.

Gipasabot ni Escober nga nagpaabot pa sila sa resulta sa medical examination sa mga bata nga ipaubos sa eksaminasyon sa Oktubre 15.

Human unya sa eksaminasyon ug magpositibo nga nahilabtan ang duha sa upat ka mga bata, mag-atubang kinig tulo ka mga kasong pagpanglugos.

Ang mga biktima gilangkuban sa usa ka lalake ug duha ka mga babaye. Nagpanuigon sila og 7, 8, 9 ug 10 anyos.

“Wala pa mi maka file sa rape kay amo pang paabuton ang resulta sa doctor kay gipa schedule sila sa October 15. So, ang gi file lang namo ganina ang acts of lasciviousness,” sulti ni Escober.

Nagduda si Escober nga adunay sakit sa utok si Tabura tungod kay motukar ang gana sa pakighilawas kung maka kitag mga bata. “Murag pedophile man ning tawhana kay hilig mag bata,” dugang ni Escober.

Nagtuo usab siya nga aduna pay laing mga bata sa Pardo nga gibiktima ni Tabura apan wala lang mo reklamo.

Tungod niini, nanawagan karon ang Pardo Police station sa mga bata ug nga ginikanan nga moreklamo sa ilang buhatan aron idugang nila sa pagpasakag kaso batok kang Tabura. (AYB)