DEAD on arrival sa tambalanan ang usa ka gibana-bana nga 30 anyos nga lalaki human giingong niambak sa Lunes sa hapon, Marso 21, sa taytayan sa Cansaga, Brgy. Tayud, lungsod sa Consolacion.

Gibana-bana nga anaa sa 14 metros ang gihabugon sa iyang giambakan.

Si Police Staff Sergeant Joel Potolin sa Consolacion Police Station niingon nga ang ilang imbestigador wala pay detalye sa rason kon unsay hinungdan sa pag-ambak sa lalaki nga giiila sa iyang mga tagtungod nga si Joel Ibale, 30.

Ang kapulisan sa lungsod nitubag sa alarma lakip na ang mga medical team personnel sa Mandaue City Disaster Risk Reduction Management Office ug maoy nidala kaniya sa tambalanan.

Apan namatay si Ibale tungod sa grabeng kadaut sa iyang kalawasan.

Sa sinugdan, wa mailhi si Ibale sa mga ning-rescue kaniya kay wa siyay bisan unsang identification (ID) card nga dala. Didto na siya ilha sa puneraryang gidad-an kaniya.

Sa pakisusi sa Superbalita Cebu, ang iyang lawas gidala sa Rolling Hills Chapel sa Brgy. Banilad, Dakbayan sa Mandaue.

Ang marketing manager sa purenarya nga si Oliver Gallardo maoy nihatag sa Superbalita Cebu sa ngan ni Ibale subay sa ilang record. Siya giila sa iyang pamilya.

Sa pagsuwat ning taho, ang mga tagtungod ni Ibale wa pa makabalik sa punerarya.