SAN Ricardo, Southern Leyte - Usa ka lalake ang missing samtang nanagat sa kadagatan sakop ning lungsod, pasado alas 5 sa hapon, Dominggo, Disyembre 1, 2019.

Gipadpad ug nabangalan na siya sa Mindanao.

Sa mao nga adlaw, medyo nakasinati na og di maayong panahon ang Eastern Visayas gumikan sa hulga sa bagyong Tisoy.

Ang missing mao si Marvin Pajo, 32, taga Barangay Cuasi, San Francisco, Southern Leyte.

Samtang nanagat sa San Ricardo sakay sa iyang pumpboat, gihapak sa dagkong bawud si Pajo.

Ang kapulisan sa San Francisco, Southern Leyte nakadawat og report gikan sa kabananay ni Marvin nga si Jechonas Pajo nga wa na mauli ang biktima.

Apan pasado alas 10 sa buntag sa Lunes, nakit-an si Marvin sa mga residente ug opisyal sa Barangay Balite, San Francisco, Surigao Del Norte.

Gidala ni Barangay Balite konsehal Junrey Coper si Pajo aron mahatagan og pagtagad ug gikontak ang pamilya niini.

Wa na makita ang gisakyan niini nga pumpboat.

Ang Philippine Coast Guard ug Philippine Atmospheric Geophysical and Astronimical Service Administration (Pagasa) kanunay mopasidaan sa mga mananagat ug kadtong dunay gagmayng sakayan sa dili paglawig kon lain ang panahon ug dunay bagyo.