Usa ka ulitawo patay human ang iyang motorsiklo gimaneho nibangga sa poste sa kuryente sa Barangay Sta. Cruz-Sto Niño, lungsod sa Balamban, ala 1:40 sa kaadlawon sa Dominggo, Abril 10.

Si Benjamin Bulacan Agua Jr., 24, ulitawo ug taga Sitio Sangkil, Brgy. Cabasiangan, lungsod sa Balamban.

Si Agua gideklarar nga dead-on-arrival (DOA) sa tambalanan human nakaangkog grabing kadaot sa iyang lawas.

Si Police Staff Sgt. Monchito Clarin sa Balamban Police Station, nagkanayon nga ang biktima kusog kaayo nakapadagan sa iyang motorsiklo nga RUSI samtang padulong mopauli sa ilang panimalay.

Gumikan sa kakusog sa dagan, wala na makontrolar niini ang manobela ug nibangga sa poste sa Cebu Electric Cooperative (Cebeco).

Si Clarin nagkanayon nga nagdali ang biktima sanglit mibunok ang uwan niadtong higayuna apan sa pagliko niini, nalahos sa poste hinungdan sa iyang kamatayon.