Niminus ang na-admit nga pasyente sa coronavirus disease 2019 (Covid-19) human ang Emergency Operation Center (EOC) sa Cebu City Government nakarehistro og labing ubos nga critical care occupancy rate gikan sa 15 ka mga tambalanan nga nahimutang sa Dakbayan sa Sugbo, Abril 25, 2021.

Si Konsehal Joel Garganera, deputy chief sa EOC, nagakanayon nga ang 15 ka private hospitals ug public hospitals nitala nalang og 23.1% occupancy rate diin ang 937 beds alang sa Covid-19 patients, 216 ra ang nagamit ug bakante pa ang 721.

Ang konsehal nga maoy gitahasan ni Mayor Edgardo Labella niingon nga “all time low” ang occupancy rate sa mga hospital facilities sa Cebu City sukad niadtong Enero diin nisugod og saka ang kaso sa dakbayan.

Niadtong Abril 25, Dominggo, adunay 46 ka bag-ong kaso samtang 62 ang bag-o sab nga nangaayo human sa ilang gihimo nga pagpatambal ug pag-quarantine.

Ang Cebu City adunay total nga 699 active cases gikan niadtong Abril 15 hangtod Abril 24. Gipanglantawan ni Garganera nga magpadayon pa ang pagtibugsok niini uban sa kooperasyon sa publiko.

Ang Guadalupe nga kanhi mag three digits, karong 44 nalang ang ilang aktibong kaso sa nilabay nga 10 ka adlaw, gisundan kini sa Lahug (36) Tisa (33), Talamban (27) ug Sambag-1 (24) nga maoy naglangkob sa top 5 barangays sa siyudad.

Sa kinatibuk-an, niabot na og 23,077 ka mga natalang kaso sa Cebu City apan 21,539 na kanila ang nangaayo sa makamatay mga virus gikan sa 243,020 ka mga individual nga gikuhaan og sample para sa Covid-19 test.

Sa 80 ka barangay sa Cebu City, 19 na kanila ang wala nay transmission sa virus samtang ang 61 aduna pay mga nagpaalim kinsa nataptan sa Covid. (PAC)