MAKABALIK pagtukod sa ilang mga balay ang 43 ka mga household owner nga nasunogan sa sityo Lourdes, Barangay Inayawan, dakbayan sa Sugbo niadtong Biyernes, Disyembre 20.

Kini ang gipadayag ni Mayor Edgardo Labella human siya nibisita sa kapin o kulang 102 ka pamilya kon 355 ka individual sa miaging adlaw ug iyang nasayran nga ang yuta nga ilang gipuy-an, gipanag-iya og pribadong tawo.

Ang mayor niingon nga baruganan sa iyang administrasyon karon nga dili mamahimong gamiton ang sunog isip rason para mapapahawa ang mga nagpuyo illegal settlers.

Si Labella nakadungog nga ang mga nagpuyo usab sa maong dapit, nag-abang sa yuta nga ilang gipuy-an ngadto sa tag-iya.

Gumikan sa diwa sa Pasko, inay tulo ra ka adlaw ang ihatag nga libreng pagkaon sa Department of Social Welfare and Services (DSWS), gihimo kining lima ka adlaw ni Labella.

Ang mayor naluoy human iyang nakita ang mga balay nga hingpit nga naugdaw ug ang mga biktima sa sunog tua nagtapok sa barangay gym sa Inayawan.

Samtang ipahigayon karong buntag ang final assessment ug evaluation sa mga nasunogan nga maoy magsilbing basehan sa DSWS sa paghatag og hinabang ug financial assistance.

Matod ni Dr. Jeffrey Ibones, pangulo sa DSWS, nga makadawat og tag P20,000 ang mga tag-iya og balay ug housing materials.

Kagabii, si Senator Bong Go niduaw sa mga nasunogan ug gihatagan usab og ayuda ang mga biktima gikan sa DSWD, National Housing Authority ug iyang personal para dali silang makabangon gikan sa pagsulay nga niabot kanila sa panahon sa pagmaya. (PAC)