Usa ka pulis namatay human naunay sa iyang service firearm atol sa pagtubag og alarma sa Barangay Bitoon, lungsod sa Daanbantayan niadtong Lunes, Abril 18, 2022.

Si Patrolman Ariel Arrabis, 33, ulitawo, sakop sa Daanbantayan Police Station Alert Team ug taga Sitio Tarnate, Barangay Malingin, Daanbantayan, naigo sa iyang dughan.

Matod ni Police Corporal Christian Vergas, sa Daanbantayan Police Station nga nahinabi sa Superbalita Cebu, nga si Arrabis uban kang Police Corporal Benjamin Villanca, ningresponde og alarma bahin sa armadong tawo sa dapit.

Usa ka concerned citizen ang nitawag sa police station nga dunay nasigpatan nga armadong tawo sulod sa sementeryo sa Bitoon.

Sa pag-abot nila ni Patrolman Arrabis ug Police Corporal Villanca sa dapit, gikatahong nahagbong ang service firearm nga 9 mm pistol ni Arrabis ug nibuto tumong sa iyang dughan.

Gidali siya sa pagdala sa usa ka tambalanan sa Daanbantayan apan gideklarar nga dead-on-arrival (DOA) human ang bala niigo sa iyang kasingkasing.

Nasayran sa kapulisan nga niadtong Pebrero 20, 2022, si Patrolman Arrabis natagak sa atabay sa ilang panimalay apan naluwas siya sa iyang pamilya.

Dugang nga kasayoran, si Arrabis nasulod kanhi sa usa ka ospital sa dakbayan sa Sugbo tungod sa pag-antos sa depresyon.

Dihang nakagawas na sa ospital, nibalik sa iyang serbisyo sa pagka pulis.