ANG nasinati nga pag-ulan sa kagabhion dala ra sa Easterlies. Kini matagamtaman lang hangtod ugma sa gabii, adlawng Huwebes, Abril 4.

Niadtong Lunes sa gabii, nasinati sa pipila ka bahin sa Kabisay-an ang mga pag-ulan-ulan sugod sa alas 9 sa gabii, ug hangtud na Martes sa kaadlawon. Hinuon kini pat-ak pat-ak lang.

Si Netherlen Saletrero, weather specialist sa Pag-asa Mactan, nga kasagaran sa Visayas, mga tutaligsik lang ang masinati.

Kini maoy epekto sa grabe nga kainiton nga nabatyagan panahon sa adlaw, hinungdan nga makamugna kini og pagpanag-om ug moresulta sa panagsa nga pag-ulan.

Nakatala ang Pag-asa Mactan og 24.3 milemetro nga sukod sa pag-ulan, apan gitataw ni Saletrero nga kulang ra gihapon kaayo kini.

Bisan sa nangagi nga katuigan, below normal ra ang natala nga ulan sa bulan sa Abril tungod usab kay ting-init kining buwana, ug ilabi na ning tuiga nga giigo usab sa weak El Niño.

Samtang ang nakaapektar usab sa panahon sa Luzon area mao ang Tail End of the Cold Front.

Bisan sa nasinati nga panagsang pag-ulan, pabilin nga 24 to 32 degrees Celsius ang temperatura kon 35 degrees Celsius ang kainiton nga masinati.

Pabilin usab hinay ngadto sa kasarangan ang paghangin diha sa kadagatan, hinungdan nga dili ra usab baluron, ug luwas ra alang sa mga molawigay.