OPISINA sa guidance councilor sa tunghaan sa St. Thomas Aquinas sa Barangay Lawaan 1, Dakbayan sa Talisay naugdaw human masunog, Lunes sa buntag, Marso 8, 2021.

Mao kini ang labing unang sunog nga mitumaw sa Talisay sa ikaduhang semana sa tibuok buwan nga pagselebrar sa Fire Prevention Month.

Matod ni FCInsp.Arniel Abella ang City Fire Marshall sa Talisay City Fire Station mibutyag sa Superbalita Cebu nga nadawat nila ang alarma sa sunog alas 10:46 sa buntag.

Tulo ka minuto ang milabay, daling miabot ang mga bombero aron sa pagpalong sa misilaub nga kalayo sa tunghaan.

Dugang ni Abella nga tungod kay nasulod dayon sa miresponde mga bombero, hinungdan nga pagka alas 10:55 sa buntag nakontrolar ang kayo.

Ang tunghaan nga gipanag-iya ni Eulver Raymond Presto.

Samtang, ang buhatan sa guidance councilor diha sa sulod apan wala na kini makakatap sa ubang bahin sa tunghaan.

Dugang ni Abella nga moabot sa P72,000 ang danyos sa sunog.

Padayon pa nga gisuta sa kabomberohan ang hinungdan sa paulbo sa kayo sa buhatan sa St. Thomas Aquinas. (BBT)