SUSIHON sa Cebu City Police Office kadtong mga certificate of employment (COE) nga gihuptan sa mga nangadakpan sa curfew niadtong Enero 25 sa gabii.

Kini human nga giuwan og reklamo ang kapulisan gikan niadtong mga giingong trabahante nga bisan sa ilang bitbit nga COE gidakop gihapon sila atol sa pagpatuman sa curfew ordinance.

Mipasabot si P/Lt.Col. Wilber Parilla, deputy city director for operations, taliwala sa ilang COE nga gidaladala gikinahanglan nga natala sa maong dokumento ang oras sa ilang trabaho.

Kini pagtino nga wa sila maglaroy-laroy atol sa curfew hours.

“Atong i-check kon tinuod ba gyud kay supposed to be man gud sa COE ato nang gisibya kaniadto nga dapat sa COE naka-indicate ang adlaw sa ilang trabaho ug ang oras sa ilang pagtrabaho para makahibalo ta kon unsang orasa sila dapat moagi diha sa karsada kay dili tanang Apor magsuroy-suroy anytime,” matod ni Parilla.

Gipahibawo sab sa opisyal nga ang mga pulis nga nag-roving mohatag og lugway niadtong gikan sa trabaho sa kondisyon nga paingon nang mopauli sa ilang balay, bisan nga milapas sa oras sa curfew.

Apan giklaro ni Parilla nga bisan pa man nga naa sa COE ang oras sa trabaho apan naabtan sila sa usa ka imnanan dili mahimong gamiton ang maong dokumento aron dili sila dakpon.

Curfew sa Dakbayan sa Sugbo magsugod sa 10:00 sa gabii ngadto na sa 5:00 sa kadlawon. (AYB)