ORMOC City, Leyte - Gihatagan na usab og pasidungog ang Dakbayan sa Ormoc tungod sa hugot nga implementasyon sa Anti-Smoking Ordinance.

Kini ang ikaduha nga higayon nga ang Ormoc nahatagan og Red Orchid Award sa Department of Health (DOH).

Gibasehan sa DOH ang mga timailhan sa hugot nga implementasyon sama sa mga signages nga gipamutang sa nagkadaiyang establisemento nga “no smoking” ug “smoke free establishment”.

Gawas niini, nabantayan usab sa DOH nga minus na ang mga naninda og sigarilyo sa dakbayan. Kon duna man, pero sekreto kaayo ang pagbaligya.

Sa paglibot sa DOH, wa usab silay nakita nga mga upos sa sigarilyo sa mga pampubliko nga lugar nga ilang giadtoan.

Nakita usab sa DOh ang mga campaign materials ug insaktong information dissemination sa Siyudad bahin sa anti-smoking ingon man ang estrikto nga pagpatuman og silot sa mga nakalapas.

Gusto usab sa Siyudad nga kadtong mga barangay tanod sa lagyo nga barangay ipaubos sa training ug seminar aron sila na usab ang tahasan sa pagdakop sa mga makalapas sa ordinansa.

Matod sa DOH, ilang gi-evaluate ang implementasyon sa 2018 ug ang pasidungog karon nang 2019 gihatag.

Gipasabot sa DOH nga kon sunod tuig makapasar gihapon ang Ormoc, makonsidera na kini nga hall of fame.

Ang Red Orchid usa ka matang sa tanom nga motubo sa mga lugar nga dili kontaminado sa polusyon.

Si Ormoc City Mayor Richard Gomez miutro sa pagpahimangno sa mga taga Ormoc ug sa mga bisita nga sundon ang mga patakaran sa Dakbayan kabahin sa kalimpyo ug hilabi na ang dili pagpanigarilyo.

Mimando ang mayor sa kapulisan nga estrikto nga pagpatuman sa mga ordinansa sa dakbayan. Gikalipay sa mayor ang pasidungog ug nagpasalamat sa kooperasyon sa mga Ormocanon.