ORMOC City, Leyte -- Laing pasidungog ang nadawat ning Dakbayan kabahin sa pagpalambo sa industriya sa turismo.

Ang pasidungog nga Best Tourism Research sa PEARL Awards gihatag sa Association of Tourism Officers in the Philippines (ATOP) sa Paoay, Ilocos Norte, Biyernes, Oktubre 4, 2019.

Matod ni Ormoc CityMayor Richard Gomez, produkto kini tanan sa ilang cultural mapping sa dakbayan.

Sa cultural mapping, gisubay kon unsay kasaysayan ug kagikan sa usa ka dapit.

“For example, nganong gitawag ni og Luna or ngano gitawag inyong barangay og Nasunogan? Wa sila kahibawo sa history sa ilang barangay. It is very important nga maghimo ta cultural mapping so they will understand our culture, our people and who the Ormocanons are,” matod sa mayor.

Dugang sa mayor nga ang cultural mapping magamit nila sa mga programa sa turismo nga ilang buhaton.

“Hopefully by next year, we will be receiving more awards. Alam naman natin na ang awards ay testament of the things that we do here. So, pag maayo ang trabaho nato, there is a chance na modaug,” dugang sa mayor.

Matod sa mayor nga garbo usab kini sa Ormoc kay maoy labing unang higayon nga nakadawat ang Dakbayan sa maong pasidungog.

Ang maong research dunay titulo nga OGMOK: Developing a Sustainable Tourism Development Plan Using Stakeholder’s Perspective Approach - The Case of Ormoc City, Leyte, Philippines.

Nagpasalamat usab ang Mayor sa mga taga Department of Education, mga propesor ug Tourism office sa pagtinabangay sa maong research.

Subay niini, ang lungsod sa Palompon Leyte, nakadaog usab isip Best Tourism Event-Adventure sport category.

Sa samang higayon, ila usab nga nadawat ang hall of fame trophy. (JKDP)