MOPASAKA og consolidated cases ang usa ka inilang environmentalist nga abogado batok sa mga opisyal sa Apo Land and Quarry Corporation (ALQC), business partner nga CEMEX, Mines and Geosciences Bureau (MGB), Department of Environment and Natural Resources (DENR) ug kagamhanan sa dakbayan sa Naga gumikan sa landslide nga niigo sa Barangay Tina-an, dakbayan sa Naga niadtong Septiyembre 20.

Gitug-an ni Atty. Benjamin Cabrido mangayo sila og P1 bilyones nga danyos, apil niini ang P500 milyones nga bayad sa kadaut nga nahiagoman sa mga biktima sa landslide ug laing P500 milyones nga gamiton alang sa rehabilitasyon sa apektadong mga dapit, nga ideposito sa hukmanan.

Hangtod alas 2:00 kagahapon sa hapon, nisaka na sa 76 ang naugkat nga mga patayng lawas ug walo ang pabilin nga missing.

Matod niya, mohangyo usab sila sa hukmanan nga moisyu og permanent environmental protection order batok sa mga kompaniya og mina ug quarrying nga ningpahimulos sa mga mineral ug bato nga nakuha nga wala magtan-aw sa sitwasyon sa mga tawo nga nagpuyo sa palibot.

Apil sa danyos nga ilang pangayuon ang nangalubong ug nangadaut nga mga gamit sa mga residente; mga sakit nga kasinatian sa mga molupyo, anxiety, ug dili makatulog og tarong.

Nauyonan nila ang maong aksyon nga himuon atol sa panagtapok sa 60 ka apektadong mga residente sa pagdahili sa yuta sa Barangay Tina-an, diin sila nagpatabang ni Cabrido.

“I assure them that I will help them,” pahayag sa manlalaban dihang nahinabi sa Superbalita Cebu kagahapon, kinsa niingon nga dili siya mangayo og professional fee sa iyang serbisyo alang nila.

Sa iyang pagkwenta, ang matag apektado nga indibidwal angay bayran og P1,000 hangtod sa P1,500 matag adlaw sa kadaut nga namugna sa landslide samtang dunggon pa sa korte ang ilang ipasakang mga kaso.

Si Cabrido nipasabot ang P500 milyones nga ilang pangayuon alang sa rehabilitasyon gikwenta niya base sa pagbanabana sa iyang nakitang kadaut sa dapit diin tag P500,000 ang danyos sa matag ektarya.

Siya nidugang nga pinaagi sa permanent environmental protection order nga luwatan sa korte, mandoan ang mga kompaniya nga hunongon ang quarrying sa Tina-an ug ubang dapit nga magbutang sa risgo sa mga tawo.

Si Cabrido nagpatabang sa iyang mga tinun-an sa abogasiya sa paghipos og mga salaysay sa apektadong mga molupyo ug pagkuha og mga ebidensiya uban usab sa abag sa mga higalang abogado nga ningboluntaryo usab sa pagtabang niya.

Si Chito Maniago, tigpamaba sa ALQC, nihangop sa planong pagpasaka og danyos batok nila, apan giklaro nga dili nila kagustohan ang nahitabo.

Matod niya, ilang pamatud-an nga wa sila’y intensyon nga mohimo og kadaut sa kasikbit nga mga komunidad duol sa ilang operasyon.

Gipasalig ni Maniago sa lokal ug nasudnong kagamhanan nga bukas ang ilang kompaniya sa bisan unsay imbestigasyon kabahin sa makalilisang nga landslide.

Sa iyang text message sa SunStar Cebu, niingon si City of Naga Mayor Kristine Vanessa Chiong nga andam niya atubangon ang reklamo.

“I will face it. In the meantime, I am focused on what is needed to be done today for Naga,” dugang ni Chiong.

Samtang, wala mohatag og komento si MGB 7 information officer Marian Codilla bahin niini.

Si Cabrido naila sa pagpasaka og mga kaso kabahin sa pagpanalipod sa kalikopan ug natural resources.

Niadtong 2007, si Cabrido ug laing duha ka mga abogado, nikiha sa Department of Energy gumikan sa pag-isyu og service contract sa Japan Petroleum Exploration Co. Ltd. sa paghigayon og oil exploitation, development ug exploitation sa resources sa Tañon Strait. (Dugang ni JKV)