Ang Cebu City Government moduso og P20 bilyunes nga budget alang sa 2023 aron pagpalig-on sa kampanya ni Mayor Michael Rama sa paghimong Singapore-like sa siyudad.

Niadtong 2022 duna lay mga P10 bilyunes nga budget, sa pagdoble sa gahin, gikinahanglan sa Siyudad ang pagpalambo sa iyang pagpaningil sa mga buhis ug pag-usab sa iyang tax code nga wa na-update sukad sa 2006, matod ni Konsehal Noel Wenceslao.

Si Wenceslao, kinsa maoy chairman sa committee on budget and finance, nisulti sa SunStar Cebu, Septiyembre 30, 2022, nga ang Local Finance Committee (LFC) sa Siyudad nag-finalize pa kon unsa ang gahinan sa budget sa sunod tuig.

Matod sa konsehal nga wa pa siyay kasayuran kon asa kuhaon ang kwarta apan ang posibleng mahitabo mao ang pagpaumento sa mga buluhisan isip usa sa mga tinubdan sa pundo sa 2023 annual budget.

“Usa sa atoang sources is atoang i-revise ang real property taxes and business taxes. It needs to be increased because the last time we had a revision was in 2006 and as far as the Local Government Code is concerned, once every three years dapat atoang i-revise ang tax code,” matod ni Wenceslao.

Matod ni Wenceslao nga ilang iduso ang revision sa tax code sa Oktubre aron kini aprobahan sa City Council sa di pa matapos ang tuig. Siya nidugang nga ang ubang local government units, lakip sa highly urbanized city sa Mandaue ug Lapu-Lapu, ningpaumento na og mga buhis.

“We have not the revision for the past 16 years, kita gyud ang pinaka ubos og buhis. Now, we need to increase kay kinahanglan man gyud. Unsaon pag sustain nato sa atong services kon dili nato sakaan ang atoang sources of funds,” matod ni Wenceslao.

SINGAPORE-LIKE

Matod niya nga pinaagi sa pagpaumento sa budget sunod tuig, ang panglantaw ni Rama alang sa Singapore-like city duol nang makab-ot.

Makatabang kini sa kampanya sa kagamhanan sa paghawan ug pagbawi sa three-meter easement sa dagkong mga agianan sa tubig sa siyudad.