MOABOT ngadto sa P2.6 million nga balor sa ilegal nga drugas ang nasakmit sa kapulisan sa siyudad sa Sugbo sulod lang sa pito ka oras nga anti drug operations.

Alas 10:10 Biyernes sa gabii, Hulyo 12, sa sitio Laguna, Barangay Bulacao, unang nasikop sa Pardo Police Station si Ray Anne Singkol Tisoy, alyas Ann, 20, taga Hawod compound, Barangay Bulacao, Dakbayan sa Sugbo.

Nakuha gikan kang Tisoy ang usa ka pakete sa gituohang shabu sa dihang napalitan sa usa ka pulis nga poseur buyer.

Sa pagrekisa, nasakmit pa ang laing lima ka dagkong putos nga motimbang ang tanan og 250 grams nga balor og P1.7 million.

Matod ni Police Major Regino Maramag, hepe sa Pardo Police Station ug nangulo sa operation, ilang na-monitor si Tisoy usa ka buwan na ang nakalabay human masikop ang iyang uyab nga si Niño Parba Camacho, kinsa naa na sa Cebu City Jail.

“Matapos mahuli ang uyab niya, na-monitor na namin ito si Ray Anne Tisoy. Inaalam pa namin kung saan galing supply niya,” matod ni Maramag.

Pagka alas 4:30 Sabado sa kaadlawon, Hulyo 13, nasikop usab sa buy bust operation sa Labangon police station sa pagpangulo ni Police Major Henrix Bancoleta ang usa ka taxi driver ug mekaniko sa dalan Salvador.

Ang mga nasikop mao silang Celso Tormis, 37, taxi driver ug Miguel Canoy, 30, mekaniko, pulos taga lungsod sa Barili.

Nakuha kang Tormis ang pito ka pakete sa gituohang shabu samtang kang Canoy ang lima ka putos nga motimbang ang tanan sa 30 gramos nga mobalor og P204,000.

Nilanat lang og 30 minutos, duha ka habal-habal driver ug usa ka trisikad driver ang nanga dakpan sa Labangon police station sa laing buy bust operation sa Bayanihan street, Barangay Quiot.

Ang mga nadakpan mao silang Wilfredo Allarse, 32, taga sitio Fatima Basak Pardo; Jonathan Baclayon, 42, taga sitio Kamansi, Barangay Quiot, mga habal-habal driver; ug Eugene Añora, 25, traysikad driver, taga Sugarland, Barangay Cansojong, Siyudad sa Talisay.

Walo ka dagkong putos sa gituohang shabu ang nakuha sa kapulisan nga motimbang og 110 grams nga mokantidad og P748,0000.

Ang bag-ong hepe sa Cebu City Police Office nga si Police Colonel Gemma Vinluan nagpasalamat sa iyang mga sakop nga padayon sa kampanya batok sa ilegal nga drugas.

Mando niya nga hutdon ang tanang drug personalities sa ilang hurisdiksyon.