SUD sa 17 ka adlaw sa pag-obserbar sa Fire Prevention Month, ang sunog sa usa ka bodega sa N. Bacalso Ave., Barangay Mambaling, siyudad sa Sugbo, pasado alas 12:00 sa tungang gabii kagahapon, Marso 17, maoy ika-13 nga alarma nga gitubag sa kabomberohan sa dakbayan.

Upat ka mga tawo ang nangaangol, tulo kanila mga bombero, sa dul-an sa upat ka oras nga pagkombate sa nagdilaab nga kayo sa bodega sa Vicky Marketing nga gipanag-iya ni Pablo Maragnon.

Matod ni FO3 Fulbert Navarro, imbestigador sa Cebu City Fire Station (CCFO), una nilang nadawat ang alarma sa mga alas 12:10 sa kaadlawon ug ilang nakontrolar ang kayo sa alas 12:58 sa kaadlawon, apan hingpit nilang napawong sa alas 4:45 na sa buntag.

Ang mga nangaangol iyang giila nga sila si Ritchie Matalaguan, 43, nakaangkon og 1st degree burns samtang naglisod sa pagginhawa sila si FO2 Astris Roble, 34; SFO1 Jeric Alburo, 35; ug si SFO1 John Kurly Bayron, 35.

Bisan kon wa pa makakatap ang sunog sa bodega, nikabat sa 38 ka mga firetruck ang ningresponde, uban sa pag-abag sa mga bombero gikan sa mga silingang lokal nga kagamhanan.

Nakamugna usab kini og kahuot sa dagan sa trapiko sayo sa buntag kay usa lang ka lane sa Mambaling flyover ang gipaagian. Kagabii, grabe pa kahuot ang trapiko kay naa pay mga firetruck kay mokalit lang og silaob ang kayo sa sud.

Sa pagsuwat ning taho, wa pa masayri ang hinungdan sa sunog sa bodega.

Matud ni Navarro dihang gitawagan sa Superbalita pasado ala una sa hapon kagahapon ang ilang pagbantay o overhauling operation sa maong sunog human makadaghan mabalik sa pag-ulbo ang kayo.

“Naa pa gyud mi diri sa fire scene, dili pata makasulti ug unsay cause of fire kay padayon pa mi diri. Bodega ni siya unya dunay sulod nga ingredients sa milk tea, mga school supplies naay mga bateriya , naay mga house hold goods, naay mga solar nga mga flash light,” matod ni Navarro.