DUL-AN sa P3 million nga nga balor sa tanom nga marijuana ang gipang-ibot sa mga sakop sa Danao City police station sa bukirang barangay sa siyudad pasado sa alas 8 kagahapon sa buntag.

Nasikop nila ang tulo ka mga tawo nga niangkon nga nagtanom nga silang Ricardo Roque 27,taga Lawaan, Danao City; Vicente Ttapia, 33, ug ang iyang amahan nga si Roque Tapia, 62, nagpuyo sa dapit.

Nakadawat og impormasyon ang Danao City police station nga adunay mga tanom nga marijuana sa Barangay Langosig, usa ka bukirang lugar nga mahimo nang ma harvest.

Gisubay dayon sa kapulisan pinangulohan sa ilang hepe nga si Superintendent Jaime Quiocho Jr., inubanan sa Drug Enforcement Unit ug Special Weapons and Tactics sa siyudad.

Gipaluparan una nila og drone nga dunay camera ang dapit nga gitug-an sa ilang informant ug nasuta nga tinuod. AYB