NIKOLEKTA na og P4.2 bilyones ang City Treasurer’s Office sa Cebu City Government og P4.2 bilyones sulod sa pito ka buwan nga estriktong pagpatuman sa koleksyon.

Si Jovy Morelos, acting City Treasurer nagkanayon nga positibo siyang makuha ang P6.1 bilyones approved annual budget sa dakbayan sanglit aduna pa silay 5 ka buwan nga subayunon ug kolektahunon.

Iyang gihulagway nga mas taas og P400 milyones ang ilang koleksyon kon itandi sa samang mga buwan sa niaging tuig human igo lang sila nga nikolekta og P3.8 bilyones atol sa unang tuig sa pag-asumir ni Tomas Osmeña isip mayor sa dakbayan.

Gipahibawo ni Morelos kinsa gitudlo ni Osmeña isip acting City Treasurer human niretiro si Tessie Camarillo sa miaging tuig nga ilang nakuha ang nahabiling P1.9 bilyones.

Ang P4.2 bilyones gibahin sa business tax ug real property tax ( RPT) diin sa buwan sa Setyembre mao ang tingbayad sa RPT ug sa Oktubre 20 sab ang deadline sa pagbayad sa business tax sa third quarter.

Si Morelos nitug-an nga usa sa hinungdan sa pagsaka sa koleksyon sa buhis nga maoy nagsilbing kinabuhi sa local government unit mao ang ilang subsob nga pagpahigayon og inspection sa mga balay patigayon.

Ila usab gipang-utingkay ang kadtong mga naglimotlimot sa pagbayad sa ilang tinuig nga buhisanan ug gipadad-an og demand letter. PAC