Nananom ang mga kawani sa Taiheiyo Cement Philippines, Inc. (TCPI) og 650 ka mga niluyong sa hawanan ibabaw sa planta nga nagsilbing dugang buffer zone sa planta.

Samtang, nakig-alayon na sab ang Solid Earth Development Corp. (SEDC) sa Cebu Archdiocesan Commission on Environmental Concerns (CACEC) sa paglusad sa “500 Years of Christianity: 500 Legacy Trees and Beyond.”

Nangunay sa paglusad si CACEC chairman Fr. Murphy Sarsonas, kanhi kura sa San Agustin de Hippo Parish Church hangtud sa miaging tulo na ka tuig, didto sa SEDC- St. Agustin Eco-Pilgrimage Park sa bukirang Magsico.

Lakip sa delegasyon ang mga sakop sa Alpha Phi Omega Phils., Inc., Cebu Pink Paddlers Dragonboat Team ug Ruach Charismatic Community nga nananom og 500 ka mga kahoy sa kanhi minahan.

Ubos sa maong programa, mananom ang kinatibuk-an sa Archdiocese sa Sugbo uban sa mga parokya ug mga nakig-ubang kapunongan og 500 ka mga kahoy sa eco-park matag bulan nga motapos sa Earth Day sa Abril 22, 2022.

Gilakip sa kalihukan ang pagpanglimpyo sa kalikopan, matod ni Mitzie Almira I. Carin, tagduma sa SEDC human resources and administration division.

Sa laing bahin, nangunay ang tagduma sa planta nga si Tatsushi Sasao sa mga Hapon nga expat sama sa duha niya ka mga luyo-luyo, sila si Seiji Horiuchi ug Kimitoshi Yoshida, ug si Taro Sumi, senior vice president for finance, ug VP administration Takuya Nose.

Gipasiugdahan ni Dwight Avila, deputy manager sa TCPI Environment and Safety Division, ang kalihukan uban sa iyang mga sakop ug first aiders sa Emergency Response Team (ERT) sa kompanya. (PR)