NAPULITIKA ang panagtapok sa gibanabanang 6,000 ngadto sa 7,000 ka mga drayber og habalhabal ug Angkas sa Cebu City Sports Center pagka Dominggo, Disyembre 23.

Ang kalihukan nga gisugdan og santos nga misa nga gipangulohan ni Cebu Archbishop Jose Palma, gitambungan usab og mga miyembro sa Bando Osmeña Pundok Kauswagan (BOPK) nga gipangulohan ni Cebu City Mayor Tomas Osmeña nga pulos magpapili sa umaabot nga eleksyon sa Mayo sa sunod tuig.

Sa kalihukan, dunay mga campaign material ang gipanghatag ngadto sa mga drayber nga nanambong nga dunay nakasuwat nga mga pangan sa mga pulitiko nga modagan sa umaabot piniliay.

Sa iyang pakigpulong, sumala ni Mayor Osmeña nga iyang ipadayon ang pagbarog alang sa panginabuhian sa mga habalhabal ug Angkas drivers.

“Ako nahimong mayor gumikan ninyo. Ang suporta sa mga pobre maoy akong gikuhaag boto (sa eleksiyon),” pahayag sa mayor, kinsa nipahibawo usab nga makadawat og 50 ka kilo sa premium quality nga National Food Authority (NFA) rice ang mga Angkas ug habalhabal drayber nga mga rehistrado sa siyudad human sa Pasko.

Matod niya, ang nasudnong kagamhanan nag-promote og pederalismo apan sa nahitabo, ang mga opisyal nga nagbase sa Manila maoy nagdesisyon alang sa katawhan gawas sa Metro Manila, nga wa mamati sa ilang mga sentimento.

Gawas sa mga opisyal sa kagamhanan sa siyudad sa Sugbo, ang mga habalhabal ug Angkas drivers nakakuha usab og suporta gikan ni Ilocos Norte Governor Imee Marcos, nga kandidato sa pagka senador sa 2019 elections.

Si Marcos nasagmuyo sa giluwat nga temporary restraining order sa Korte Suprema nga nagpahunong sa mga serbisyo sa Angkas gumikan sa kakuwang og prangkisa sa pag-operate.

Ang gobernador nihulagway sa pagpadili na pag-operate sa Angkas ug habalhabal nga anti-poor ug anti-consumer sanglit kini lang ang labing paspas ug bugtong publikong sakyanan sa kabukiran, sa mga dapit diin grabe ang trapiko ug mga lugar nga way mga mobiyaheng publikong mga sakyanan. (B)