SINGKO anyos nga batang babaye ug amahan nangaangol human sila pusila sa ilang silingan sa Martes sa gabii, Septiyembre 8, 2020 sa Sityo Naba, Barangay Mambaling, Siyudad sa Sugbo.

Si Police Corporal Noel Timagos sa Mambaling Police Station nga nahinabi sa Superbalita Cebu niila sa mga biktima nga sila si Leonora Calurasan, ug Roy Carulasan.

Ang bata dunay samad sa wala nga paa samtang ang amahan naigo sa tuo nga tiil sa bala sa kalibre .45 nga pistola.

Matod ni Timagos nga ang amahan maoy target, apan ang bala nilapos, niigo sa anak.

Wa kaayo sila makakuhag detalye sa ilang imbestigasyon sa motibo sa pagpamusil sanglit si Roy di mokooperar kanila dihang ila kining giimbestigar.

Away ang gitan-aw nga anggulo nga motibo sa tinguhang pagpatay.

Ang suspek nga giila lang sa alyas nga Jimboy daling misibat.

Ang Scene of the Crime Operation (SOCO) personnel nakuha og lima ka mga bala sa kalibre .45 nga armas sa nahitaboan. (BBT)