GIDEKLARAR nga dead-on-arrival ang usa ka lalake nga pasahero sa barko nga paingon unta og Manila gikan Cebu human kini makasinati og severe asthma.

Ang biktima naila nga si Recafort Cipriano, 69 anyos, residente sa Macapagal, Mabalakat, Pampanga kinsa gidali pagdala sa sakop sa Philippine Coast Guard Central Visayas (PCG 7) sa tambalanan aron unta matambalan.

Sa pakisusi sa PCG 7, nibiya ang gisakyan sa biktima nga M/V St. Francis Xavier gikan sa Pier Area sa siyudad sa Sugbo alas 11 karong buntag sa Huwebes, Hulyo 11, 2019.

Apan alas 4:10 sa hapon ganina dihang nakadawat og taho ang PACG 7 pinaagi sa asawa sa kapitan sa barko nga si Catalina Montayre kabahin sa kahimtang ni Cipriano diin kasamtangan nga naglawig sila sa kadagatan sa Borbon, amihanang Sugbo.

Tungod sa maong panghitabo, daling nagpadala og speed boat ang PCG Danao City detachment ug gidali pagtabang ang biktima apan wala na kini matabang ug gideklarar nga patay alas 6:32 karong gabii. (HBL)